Posted on: December 18th, 2018
Wakulima wametakiwa kufuata kanuni bora na za kisasa za kilimo katika uzalishaji wa mazao ya chakula na biashara ili kukuza uchumi wa nchi.
Wito huo umetolewa na Mkuu wa Wilaya ya Kilombero ndugu James Ihunyo Desemba 18,mwaka huu alipokuwa akihutubia katika uzinduzi wa msimu mpya wa kilimo kwa Halmashauri ya mji wa Ifakara uliofanyika katika viwanja vya shule ya msingi Lipangalala mjini Ifakara.
Mkuu huyo wa wilaya amesema kuwa wadau wa kilimo wanapaswa kushirikiana ili kusaidia katika kuwakuza wakulima wadogo wadogo,kuwekeza katika mazao ili kufanikisha azma ya kuifikia Tanzania ya viwanda na kuwasaidia vijana kujipatia ajira ambapo pia alitumia fursa hiyo kuvikumbusha vikundi vyote vilivyopata mikopo kutoka katika halmashauri ya mji wa Ifakara kurejesha mikopo hiyo ili kuviwesha vikundi vingine kukopa na kutumia fedha hizo katika miradi mbalimbali ikiwemo ya kilimo.
'Ifakara tunapenda kuwa mfano bora kwa kilimo na ufugaji wenye tija,na kwa mujibu wa takwimu halmashauri yetu haijawahi kukabiliwa na janga la njaa,lakini hatupaswi kuishia hapo bali tunapaswa kuzalisha kwa tija hali itakayosaidia upatikanaji wa ajira kwa vijana wetu ambao watazipata katika viwanda vitakavyokuwa vimepatikana kutokana na uzalishaji kutoka katika sekta ya kilimo na ufugaji ndani ya Halmashauri ya Mji wa Ifakara'amesema ndugu Ihunyo.
Kwa upande wake mwenyekiti wa Halmashauri ya mji wa Ifakara Mashaka Mbilinyi ameipongeza idara ya kilimo na wadau kwa ujumla kwa kufanikisha uzinduzi huo na kueleza kuwa halmashauri hiyo imejikita katika sekta muhimu kama afya ,elimu ,maji, kilimo na mifugo kwa kutumia kilimo na ufugaji wa kisasa na kutarajia kutenga eneo kwaajili ya soko la pamoja ili kuwahudumia wajasiria mali .
Akizungumzia lengo la uzinduzi huo,afisa kilimo wa halmshauri ya mji wa Ifakara Bi.Happines Mbele amesema kuwa uzinduzi huo umefanyika ili kutoa hamasa,miongozo na taarifa mbalimbali za kilimo pamoja na kuwahimiza wakulima kuandaa mashamba kwa wakati,kuanza kulima zao la korosho ambalo ni zao la kimkakati,kuwakumbusha na kuwahimiza mawakala wa pembejeo za kilimo juu ya upatikanaji wa pembejeo kwa wakati pamoja na kuhimiza matumizi ya teknolojia katika shughuli za kilimo.
Akizungumzia uzinduzi huo,mdau wa kilimo kutoka Tanganyika Farmers Association(TFA),ndugu Joseph Rwazael ameipongeza halmashauri hiyo kwa kuona umuhimu wa siku hii ya msimu wa kilimo huku akiahidi kushiriki katika kutoa elimu ya kilimo na ufugaji pamoja na kusambaza viwatilifu vyenye ubora ili kupata mazao bora ya chakula na biashara.
Uzinduzi huo wa msimu wa kilimo kwa mwaka 2018/2019 umewahusisha wadau mbalimbali wa kilimo ikiwa ni pamoja na TFA,USAID Nafaka,madiwani kutoka halmashauri ya mji wa Ifakara pamoja na wananchi huku matarajio yakiwa ni kufikiwa na kutumiwa kwa hekta 20102.5 zinazofaa kwa kilimo ambapo kati ya hizo hekta 1560 zinafaa kwa kilimo cha umwagiliaji ilhali hekta 300 pekee zikiwa zinatumika kwa aina hiyo ya kilimo
