WENYEVITI WA SERIKALI ZA MITAA WATAKIWA KUWA MSTARI WA MBELE KATIKA KUTATUA KERO ZA WANANCHI

Posted on: January 7th, 2025

Wenyeviti wa Vitongoji, Vijiji na Mitaa wa Halmashauri ya Mji Ifakara wametakiwa kuhakikisha wanasikiliza na kutatua kero mbalimbali zinazowakabili wananchi katika maeneo yao.

Hayo yamesemwa   Januari 7 ,2024 na Afisa Tawala wa Wilaya ya Kilombero Phabius Byamungu alipokua akimuwakilisha Mkuu wa Wilaya ya Kilombero Mhe. Wakili Dunstan Kyobya aliyekuwa Mgeni Rasmi wakati wa   kufungua Mafunzo Elekezi kwa  Wenyeviti wa Mitaa, Vitongoji na Vijiji katika Ukumbi wa Mlimba uliopo Halmashauri ya Mji Ifakara.

Aidha aliwataka  Wenyeviti hao  kuhakikisha wanasimamia suala la Ulinzi na usalama katika maeneo yao, kupambana na Rushwa, kupinga ukatili wa kijinsia, kusimamia Mazingira, kushiriki katika miradi ya Maendeleo na kuibua vyanzo vya mapato.

" Twende tukatende haki tukawasikilize Wananchi wetu, tukasimamie majukumu yetu,tunatarajia ninyi ndio muwe mfano na walimu mara baada ya Mafunzo haya". Alieleza Bw .Byamungu

Mmoja wa  Wenyeviti hao Bw. Geoffrey Mtapika ambaye ni Mwenyekiti wa Kijiji cha Njokamoni  Kata ya Mang' ula aliishukuru  Halmashauri ya Mji Ifakara kwa  kuwapatia Mafunzo hayo kwani yatakua muongozo katika majukumu yao na kuahidi kuboresha maeneo yote yaliyokua na mapungufu .

"Ninashukuru kwa Mafunzo haya kwani yananipa mwanga katika Shughuli zangu za kiutendaji".Alisema Bw. Geofrey.

Kwa upande wake Mkuu wa Idara ya Utawala na Usimamizi wa Rasilimaliwatu wa Halmashauri ya Mji Ifakara Bw. Rashid Semngoya alisema Mafunzo hayo yameandaliwa kwa Viongozi hao Ili waweze kutambua majukumu yao na kufanya Kazi kwa ufanisi. Aidha Mafunzo hayo yalitolewa na  wawezeshaji  kutoka Chuo cha Serikali za Mitaa  (LGTI) - Hombolo .