VIZIMBA MAALUM VYA KUTUPA MAKOPO YA VIUWATILIFU VYATAKIWA KUJENGWA KATIKA KATA ZA HALMASHAURI YA MJI IFAKARA.

Posted on: June 5th, 2025

Na: Nuru Mangalili - Ifakaratc , Habari

Vizimba Maalum kwaajili ya Kutupa Makopo ya Viuwatilifu vimetakiwa kujengwa katika kila Kata za Halmashauri ya Mji Ifakara ili kuweka udhibiti bora wa utunzaji wa taka ndani ya Halmashauri.

Hayo yamesemwa leo Alhamisi Juni 5, 2025 na Afisa Tawala wa Wilaya ya Kilombero Bw. Fabius Byamungu aliyekuwa akimwakilisha Mkuu wa Wilaya ya Kilombero Mhe. Wakili Dunstan Kyobya wakati wa Maadhimisho ya Siku ya Mazingira Duniani ambayo kihalmashauri  iliadhimishwa kwa kufanya Usafi katika Soko Kuu la Ifakara lililopo Kata ya Ifakara.

Awali aliwataka Wananchi kuhakikisha wanakabiliana na changamoto za utunzaji wa Mazingira kwa kuwa kwa sasa Dunia imekuwa ikikabiliwa na changamoto mbalimbali za uharibifu wa mazingira zinazotokana na kuongezeka kwa shughuli za kibinadamu   ikiwemo utupaji hovyo wa taka ngumu na plastiki, ukataji holela wa miti na uchomaji wa misitu hivyo kusababisha madhara mbalimbali kama uwepo wa magonjwa hatarishi kama kansa kutokana na utupaji holela wa taka hatarishi kama chupa za viuwatilifu katika vyanzo vya maji na utumiaji wa chupa hizo majumbani kwa shughuli mbalimbali kama utunzaji wa mafuta ya kula, chumvi ,maji n.k uharibifu wa vyanzo vya Maji, ardhi kupoteza ubora na kupungua uwezo wa kuzalisha, upotevu wa viumbe hai wa ardhini na majini , ongezeko ya hali ya jangwa na ukame n.k.

Afisa Tarafa wa Ifakara Bw. Fabius Byamungu akizungumza na Wafanyabiashara wa Soko Kuu Ifakara  juu ya Utunzaji wa Mazingira wakati wa Maadhimisho ya Siku ya Mazingira Duniani

“Ili kukabiliana na changamoto za Utunzaji wa Mazingira na  rasilimali wananchi wa Ifakara tunaowajibu wa kuhakikisha tunalinda na kutunza  mazingira kwa kuzuia matumizi ya plastiki kuwa kibebeo cha bidhaa dukani, sokoni, buchani, n.k kuzuia utupaji hovyo wa makopo ya plastiki, ukataji miti hovyo na uvamizi wa maeneo ya hifadhi”. Alisema Bw. Byamungu na kuongeza “utupaji wa makopo ya viuwatilifu ufanyike  kwenye vizimba maalumu ili kuweka utunzaji wa taka,   hivyo kila Kata ijenge Kizimba maalum kwaajili ya kutupa makopo ya viuwatilifu. Alimaliza  Bw. Byamungu

Kwa upande wake Afisa Mazingira wa Halmashauri ya Mji Ifakara Bi. Salome Mayenga aliwasisitiza Wananchi wa Ifakara kuhakikisha  wanawajibika kutunza mazingira kwa kufanya usafi katika maeneo yao kila  mara na kuepuka matumizi ya plastiki.

Kauli mbiu katika Maadhimisho hayo kwa Mwaka huu ni “Mazingira Yetu na Tanzania Ijayo, Tuwajibike Sasa , “ Dhibiti Matumizi ya Plastiki”.

****MWISHO*****