HALMASHAURI YA MJI IFAKARA YAADHIMISHA MIAKA 63 YA UHURU KWA KUPANDA MITI ELFU KUMI

Posted on: December 9th, 2024

Halmashauri ya Mji Ifakara Imeadhimisha  miaka 63 ya Uhuru kwa Kupanda miti elfu 10 katika Kata ya Mbassa.

Tukio hilo limeongozwa na  Mkuu wa Wilaya ya Kilombero Mhe.Wakili Dunstan Kyobya ambapo miti hiyo ilipandwa kando ya mto Lumemo uliopo Kata ya Mbasa.

Aidha Mkuu huyo wa Wilaya alimshukuru Rais wa Jamhuri ya  Muungano wa Tanzania Mhe. Dkt. Samia Suluhu Hassan kwa kuleta fedha Kwa ajili ya ujenzi wa tuta la kuzuia maji ya Mto Lumemo kwenda kwenye makazi ya watu na kusababisha mafuriko.

" Leo tumepanda miti kando ya Mto Lumemo ikiwa ni maelekezo ya  Rais wa Jamhuri ya Muungano wa Tanzania Mhe. Dkt. Samia Suluhu Hassan  Kwamba kila Wilaya,Kila mwananchi Kupanda mti siku ya 9 Disemba kama uhifadhi wa mazingira hivyo niziombe taasisi zingine kuja kupata maeneo ya kutengeneza garden kuanzia daraja la Machipi mpaka Lipangalala kuwe na maeneo ya kuvutia."Amesema Mhe.Kyobya

Kwa upande wake Kaimu Mkurugenzi wa Halmashauri ya Mji Ifakara Bibi. Witness Kimoleta aliutaka uongozi wa Kata ya Mbassa kuitunza miti hiyo ili kuhakikisha inakua vizuri.

" Afisa Maendeleo ya Jamii ahakikishe  miti inapandwa katika Eneo hili na pia nitoe wito na niagize Serikali ya Kijiji na Kata ya Mbassa kuhakikisha Ulinzi na usalama wa maeneo haya yaliyokwisha pandwa miti ili iweze kukua vizuri". Alieleza Bibi. Kimoleta.

Nae Katibu Tawala wa Wilaya ya Kilombero Bw. Abraham Mwaikwila  aliwasihi Wananchi kushiriki shughuli za Kijamii katika maeneo mbalimbali ikiwemo Kupanda miti, kufanya usafi  sehemu mbalimbali.

" Ifakara tuna NGOs nyingi ambazo zina jihusisha na Uhifadhi wa Mazingira hivyo niwasihi wazidi kujitokeza kupata maeneo ya kupanda miti ili kutunza Mazingira  yetu. Alisema Bw. Mwaikwila