Posted on: December 1st, 2018
Halmashauri ya mji ifakara imejipanga kuwasaidia watoto yatima walio poteza wazazi wao kutokana na virusi vya Ukimwi wanaoishi katika mazingira hatarishi na kuwapatia vipaumbele waathirika wa virusi vya ukimwi kwa kuwapatia msaada wa mikopo ya kifedha kupitia vikundi vyao pamoja na ruzuku kutoka serikalini kwa lengo la kuboresha vikundi hivyo na kuboresha afya zao na hali ya kiuchumi miongoni mwao.
Hayo yameelezwa na diwani wa viti maalumu Mh,Magreti Lipindi aliyekuwa mgeni rasmi katika maadhimisho ya siku ya ukimwi duniani Desemba mosi mwaka huu yaliyofanyika katika shule ya msingi Muhola iliyopo mjini Ifakara.
Katika hatua nyingine,mheshimiwa Lipindi amesema kuwa Halmashauri imeunda mabaraza ya watu wanaoishi na virusi vya Ukimwi yanayo julikana kama konga ili kusaidia kuelimisha rika dhidi ya maambukizi ya virusi vya ukimwi huku serikali ikiwa imeelekeza nguvu kubwa kwa kuongeza vituo vya afya vinavyotoa huduma ya VVU na Ukimwi na kuhakikisha elimu ya kujikinga na VVU na Virusi vya UKIMWI inapatikana pamoja na kuboresha huduma za afya.
Awali akizungumza katika maadhimisho hayo,Mratibu wa shughuli za Ukimwi katika halmashauri ya mji wa Ifakara Daktari,Peter Mlenge alitumia fursa hiyo kuwakumbusha wananchi juu ya jitihada za mapambano dhidi ya Ukimwi ambapo alitoa historia ya ugonjwa huo nchini kwa kusema kuwa mgonjwa wa ukimwi nchini alitambuliwa kwa mara ya kwanza mnamo mwaka 1983 na kuongeza kuwa kwa upande wa Halmashauri ya mji Ifakara kwa mwaka 2016 takwimu zilionesha kuwa kiwango cha maambukizi kilikuwa asilimia 6.7 kutokana na juhudi zilizo fanyika mwaka 2017,kiwango cha maambukizi kimeweza kushuka hadi kufikia asilimia 5.6 na kuongeza kuwa watu wanao tumia dawa za kufubaza makali ya virusi vya ukimwi( ARV) ni 5273 wanaume wakiwa 1684 wanawake 3589 na walioacha matumizi ya dawa walikuwa 2928 kwa takwimu hii inaonyesha maambukizi mapya ya virusi vya ukimwi katika halmashauri hiyo bado yako katika kiwango cha juu ukilinganisha na takwimu za mkoa ambayo ni asilimia 3.8.
Akizungumza katika maadhimisho hayo mmoja kati ya wadau wa wa mapambano dhidi ya ukimwi Bi Anjela Robert Mchome kutoka (Reynold Construction Limited)watengenezaji wa barabara kutoka Kidatu- Ifakara kwa kiwango cha lami amesema kuwa barabara zimekuwa zikichangia kwa kiasi kikubwa katika kuenea kwa virusi vya ukimwi na kuwataka wananchi kuwa makini.
Aliongeza kuwa tunapaswa kuzungumzia ukimwi pale tunapo kutana katika vikao na mikutano mbalimbali huku akiwataka watu wanao jua kuwa wanaishi na vvu kuacha kuambukiza kwa makusudi.
Maadhimisho hayo yenye kauli mbiu isemayo pima tambua ishi yaliambatana na michezo mbalimbali ngoma, mpira wa miguu, kuruka kwa kutumia magunia na kuvuta kamba huku washindi wakipatiwa zawadi mbalimbali katika michezo yote kwa walioshinda ambapo pia ylihudhuriwa na wadau mbalimbali ikiwa ni pamoja na Ifakara Health Institute(IHI),SAUTI, USAID KIZAZI KIPYA ,JHPIEGO.
