WATUMISHI WA HALMASHAURI YA MJI IFAKARA WATAKIWA KUFANYA KAZI KWA BIDII NA WELEDI

Mkurugenzi wa Halmashauri ya Mji Ifakara Bi. Zahara Michuzi amewataka Watumishi wa Halmashauri ya Mji Ifakara kufanya Kazi kwa weledi , maarifa na  kuzingatia kanuni, Sheria ,maadili na miongozo ya Utumishi wa Umma.

Hayo ameyasema leo Alhamisi Januari 23,2025  katika Kikao cha Wafanyakazi wote kilichofanyika katika Ukumbi wa Mikutano uliopo Halmashauri ya Mji Ifakara.

Bi. Zahara alisisitiza umuhimu wa Kila mfanyakazi kutoa huduma Bora katika eneo lake la Kazi  na kuhakikisha kila mmoja anahakikisha  Malengo ya Halmashauri yanafikiwa, huku akiwataka Wafanyakazi kutoa huduma kwa Usahihi , uharaka na kwa ufanisi.

" Kila mtu akawajibike katika eneo lake la kazi, tufanye kazi kwa ushirikiano mkubwa ili kuboresha utendaji kazi katika kila Idara". Alieleza Bi. Zahara na kuongeza

" Tuhakikishe tunatoa  huduma bora kwa Wananchi ,tuwasikilize na  tukatatue kero zao ili jamii yetu izidi kustawi ". Alimaliza Bi. Zahara

Awali Mkuu wa Idara ya Utawala na Usimamizi wa Rasilimaliwatu wa Halmashauri ya Mji Ifakara Bw. Rashidi Semngoya aliwasisitiza  watumishi wote kuzingatia kanuni, miongozo, Sheria  na taratibu za Utumishi wa Umma katika kutekeleza majukumu yao ya kila siku.

Aidha ,Watumishi hao walikula kiapo cha Utii, Uadilifu  na kutunza Siri.

Nae mmoja wa Watumishi hao Bw.David Kapanga ambaye ni Mkaguzi wa ndani wa  Halmashauri ya Mji Ifakara aliahidi kutekeleza yale yote waliyoambiwa katika kikao hicho na kuahidi kuishi katika kiapo walichoapa na  kuzingatia miongozo yote ya Utumishi wa Umma katika kutimiza Malengo ya Halmashauri ya Mji Ifakara.