"WAKULIMA WANUFAIKE NA UWEPO WA KIWANDA CHA SUKARI KILOMBERO "MHE.WAKILI DUNSTAN KYOBYA

Mkuu wa Wilaya ya Kilombero Mhe. Wakili Dunstan Kyobya amesema uwepo wa Kampuni ya  Sukari Kilombero uwe chachu ya  kuwanufaisha  wakulima wa Miwa katika Wilaya hiyo .

Hayo ameyasema leo Alhamisi Februari 6, 2025 wakati alipokuwa Mgeni Rasmi katika Mkutano wa Wadau wa ndani wa Kampuni ya Sukari Kilombero akimuwakilisha Mkuu wa Mkoa wa Morogoro Mhe. Adam Kighoma Malima .Mkutano huo uliofanyika katika Ukumbi wa Mikutano uliopo katika Kampuni hiyo Kata ya Kidatu - Ifakara.

"Zone zifanyike vizuri ,teknolojia ya Uzalishaji iongezeke ili wakulima wazalishe kwa tija". Alieleza Mhe. Kyobya 

Aidha Mkutano huo ulihudhuriwa na Naibu Waziri wa Mambo ya Nje Ushirikiano wa Afrika Mashariki anayeshughulikia Masuala ya Afrika Mashariki Mhe. Dennis Londo( MB) ambapo aliwataka Viongozi katika Maeneo hayo  kuwa daraja la kuwaunganisha Wananchi na  Kampuni hiyo ya Sukari  kwa kuendelea kudumisha amani , utulivu na mahusiano mazuri baina yao.

" Bonde hili linategemea muwa kama chanzo cha Uchumi, Viongozi mnakazi ya kusimamia amani na utulivu, kwenye  utulivu na amani lazima kuwe na uzalishaji wenye tija". Alisisitiza Mhe.  Londo

Aidha DC Kyobya alisisitiza kila AMCOS ihakikishe inapanda Miche ya Matunda 5000 na  kuahidi kutoa miche  bure kwa AMCOS hizo .Vilevile alieleza juu ya umuhimu wa kulinda vyanzo vya maji ili kuondoa migogoro  katika vyanzo  hivyo.

Kwa upande wake Mkurugenzi wa Mahusiano na Mawasiliano wa Kampuni ya Sukari Kilombero Bw. Derrick Stanley alieleza lengo la Mkutano huo  ni kuboresha mahusiano baina ya Kampuni na Wadau wake  na  kuhakikisha mahusiano hayo yanaimarika zaidi.

" Niwapongeze  wadau wetu kuhakikisha Kiwanda  kinapata muwa kila siku, lengo kubwa ni kuhakikisha Kiwanda hiki kinapata muwa na Sukari ya uhakika". Alisema Bw. Derrick