MKUU WA WILAYA YA KILOMBERO MHE.WAKILI DUNSTAN KYOBYA APOKEA MICHE YA KIMKAKATI 16,090 KUTOKA SHIRIKA LA SIX RIVERS AFRICA.

Mkuu wa Wilaya ya Kilombero Mhe. Wakili Dunstan Kyobya amepokea miche 16,090  ya  Kakao, Michikichi , korosho na Karafuu kutoka Shirika la Six Rivers  Africa  linalojihusisha na uhifadhi wa wanyama pori na kukuza uchumi wa jamii zinazopakana na hifadhi ya Taifa ya Nyerere Halmashauri ya Mji Ifakara.

Miche hiyo  imepokelewa leo tarehe 21 Novemba 2024 katika Ofisi za Six Rivers Africa ambapo Mkuu  wa Wilaya alilipongeza Shirika hilo kwa uhifadhi wa mazingira na kusema kuwa  Miche hiyo itabadilisha maisha ya mtu mmoja mmoja au kikundi na kuwataka Maafisa Maendeleo ya jamii na Wadau wote wa mazingira kuhamasisha na kutoa  Elimu ya kutosha kwa Wananchi juu ya uhifadhi wa mazingira.

"  Miche hii 16090 inatupa mwongozo wa kipi tufanye badala ya kukata miti  haya Mazao ya kakao, korosho, Michikichi na karafuu yatasaidia kuwapa kipato cha mtu mmoja mmoja na mwisho wa siku uhifadhi wa mazingira utafanyika katika maeneo yetu". Alieleza Mhe. Kyobya

Kwa upande wake  Bi. Irene Masonda ambaye ni Afisa Mradi wa Shirika la Six Rivers  Africa alisema Miche hiyo ni Miche ya kibiashara ambaayo mkulima akichanganya katika shamba lake atakua na uwezo wa kuvuna  Mazao mengine kwa muda mfupi.

Aidha , Vijiji vitakavyonufaika na mradi huo ni 12 vilivyopo ndani ya Kata 8 ambavyo ni Katindiuka, Mbasa, Lugongole, sagamaganga, signali, nyamwezi,Mkasu ,bwawani ,mhelule,mikoleko, msalise na miwangani.