DC Kyobya azindua wodi ya kujifungulia wakina mama wajawazito na vifaa tiba,kituo cha Afya kibaoni

Mkuu wa Wilaya ya Kilombero Mhe. Wakili Dunstan Kyobya leo Jumatatu tarehe 28 Oktoba 2024 amezindua Wodi ya kujifungulia wakina mama  wajawazito katika Kituo cha Afya Kibaoni kilichopo Halmashauri ya Mji Ifakara  pamoja na Vifaa tiba ikiwemo Kiti cha Kung'olea meno ( Dental Chair) , mashine ya kufulia pamoja na Mashine ya Mionzi (X Ray).

Aidha alimshukuru Mhe. Rais wa Jamhuri ya Muungano wa Tanzania Dkt. Samia Suluhu Hassan kwa kuleta kiti cha kisasa cha kung' olea meno chenye thamani  ya Shilingi Milioni 21, Mashine ya kufulia yenye thamani ya Shilingi Milioni 22, pamoja na Mashine ya mionzi (X Ray) yenye thamani ya Shilingi Milioni 566.

Vile vile, Mhe. DC alimshukuru Mdau SOLIDARMED kwa kukarabati wodi ya Kujifungulia kina mama na pia  alimshukuru Mbunge wa Jimbo la Kilombero Mhe. Abubakari Asenga kwa kusaidia upatikanaji wa Vitanda katika wodi hiyo ya kina mama.

" Shukrani kwa Mhe. Rais wa Jamhuri ya Muungano wa Tanzania  Mhe. Dkt . Samia Suluhu Hassan kwa kutuletea vifaa  tiba hivi,  kwani vitatatua changamoto nyingi katika Hospitali hii  hivyo kila mtumiaji , wagonjwa na wanaifakara kwa ujumla tunapaswa kuvitunza ili viendelee kutusaidia ". Alisema Mhe. Kyobya

Kwa upande wake Mganga Mfawidhi wa Kituo hicho Daktari Dorcas Ng'wandu alishukuru kwa upatikanaji wa Vifaa hivyo na kuahidi kuvitumia vizuri.

Aidha Mhe. Kyobya alitumia nafasi hiyo kumpongeza Mkurugenzi wa Halmashauri ya Mji Ifakara Bi .Zahara Michuzi kwa kusimamia vizuri Utekelezwaji wa miradi mbalimbali  ya Maendeleo katika Halmashauri hiyo.